吴语短文《湖畔夜谈》（吴语文写作）

吴语文：

箇两日心里向弗蛮快活，吾就一个人到太湖边哴荡白相，坐嘞凉亭里吹吹风，真觉写意，心情也好交关。正想起身回转嗰辰光，碰著个阿姨齐巧走进来，见着吾就讲：

“侬看今朝嗰风赞弗啦？”

“赞～欸，阿姨上海人啊？”

“哎哟，畀侬听出来哉！阿啦老底子是上海松江嗰，不过六几年就下放过来哉，住嘞湖州长远哉。”

“箇么阿姨也算半个湖州人咯？”

“是嗰呀，箇辰光下放嘞星桥村么，现在屋里嘞太湖边哴呶。”

“星桥村？吾姆妈乡下头么！弄弗好认得嗰。吾姆妈叫惠英呀，尔认得弗啦？”

“认得啊！哪会得弗认得？侬去问声倷姆妈看，认得吾弗啊？阿拉叫得沈月玲，箇辰光侪家侪小玲小玲介叫吾嗰。”

“介回事体啊，湖州城真觉小欸，弄弄看么侪认得嗰，亲眷搭朋友，嘿嘿。”

“倷姆妈介歇还教书弗啦？”

“老早退休哉，年纪么也大哉，介歇就嘞屋里向领领孙子。”

“介倒好嗰。箇么渠现在身体奈何啦？”

“好煞，日朝锻炼身体。”

“倷姆妈算嘞写意里向哉，夫妻档侪是教书嗰，吾就呒没介交运哉。”

“箇么阿姨尔倒讲讲看，哪会得弗交运啦？”

“讲畀侬听也好嗰，侬可以搭吾讲嗰闲话写篇文章，让倷箇辈晓得滴箇个年代嗰事体。”

“好嗰，阿姨。”

“吾呢，比倷姆妈小一岁，四八年出世嗰，生嘞新中国前头，也算是民国时期嗰人哉。阿啦老头子是箇辰光光华大学嗰教授。讲到光华大学，倷笃定弗晓得嗰，就是现在华师大嗰前身。姆妈么当小学老师嗰，阿啦小辰光就嘞渠教书嗰学堂里向读书。吾还记得清清爽爽，箇辰光课本侪是老写字，压末来再行出个简体字，后头又弄出个两简字，讲起来要为广大工农兵服务呶，不过呒没几时就废除脱哉。